BUTUAN CITY – Nagpahibalo ang Government Service Insurance System (GSIS) nga maghatag og emergency loan alang sa mga biktima sa landslide sa Cebu ug sa pagbuto sa Mayon Volcano sa Albay.
Ang mga miyembro nga nagpuyo ug nagtrabaho sa Albay o Cebu mahimong makapahulam basta adunay bayad nga premium sulod sa tulo ka bulan sa miaging unom ka bulan, walay kaso nga administratibo o kriminal, ug walay utang nga sobra sa unom ka bulan.
Kinahanglan usab nga adunay take-home pay nga dili moubos sa ₱5,000 human sa deductions.
Alang sa mga pensioners, kinahanglan nga adunay 25% sa ilang basic monthly pension nga mabilin human sa loan deduction.
Ang emergency loan mabayran sulod sa 3 ka tuig nga adunay 6% interest rate kada tuig ug walay processing fee.
Ang bag-ong aplikante makapahulam og ₱20,000, samtang ang adunay existing loan makapahulam og ₱40,000, apan kuhaan ang balance aron makuha ang maximum net nga ₱20,000.
