BUTUAN CITY – Misaka na sa 17 ka mga tawo ang namatay sa landslide sa West Java, Indonesia kagahapon Lunes, Enero 26 nga mi-igo sa Pasir Langu village sa Bandung Barat region, usa ka bukirong bahin nga mga 100 kilometro ang gilay-on gikan sa Jakarta.
Sumala sa National Disaster Mitigation Agency laing 73 pa ang missing ug padayon pang gipangita. Sigon sa mga otoridad, natigayon ang landslides tungod sa kusog nga ulan nga nagsugod niadto pang Biyernes, resulta nga kapin sa 30 ka panimalay ang nalubong sa midahiling yuta ug lapok.
Apil sa mga nawala ang 23 ka opisyal sa navy nga mi-apil sa border patrol training dihang nahitabo ang trahedya. Sigon ni Navy Chief Muhammad Ali, naglisod usab ang mga rescue teams sa pag-abot sa lugar tungod sa dautang panahon ug kakulang sa mga heavy equipment.
Nasayrang nakasinati og flash floods ang pipila ka bahin sa Indonesia, lakip ang West Java ug Jakarta, nga miresulta sa pugsanong pag-evacuate sa mga residente.
Natigayon ang landslides duha ka bulan lamang human ang lapad nga baha ug landslide sa Sumatra nga mikalas og 1,200 ka mga tawo ug naka-apekto sa kapin sa usa ka milyon ka mga residente.
