BUTUAN CITY – Gi-ila si Korean comedian host Ryan Bang isip usa sa Top 10 public figures nga nakatabang sa pagpalambo sa global image sa South Korea, ka-uban ang mga K-pop giants nga BTS ug Blackpink.
Base sa 2025 Republic of Korea Country Image Survey nga gipagawas sa Ministry of Culture, Sports and Tourism niadtong Enero 20, si Bang nakab-ot sa ika-siyam nga puwesto sa listahan.
Ang BTS mao ang nag-una sa rank, gisundan sa football star nga si Son Heung-min sa ikaduhang puwesto ug Blackpink sa ikatulo. Ang aktor nga si Lee Min-ho nakab-ot sa ika-upat, samtang ang idol girl ug boy groups collectively sa ika-lima.
Si Jungkook sa BTS naa sa ika-unom, gisundan sa political figure nga si Lee Jae-myung sa ika-pito ug mga presidente ug national leaders sa ika-walo.
Si Ryan anaa sa ika-siyam nga pwesto samtang si Lisa sa Blackpink mao ang nakakompleto sa Top 10.
Aminado si Ryan nga nakurat siya nga na-apil siya sa listahan ug nalipay nga gi-ila isip tulay sa Korea ug Pilipinas dayong pasalamat sa mga Pilipino ug misaad nga magpadayon pa siya sa pag-promote sa maayong relasyon sa Korea ug Pilipinas.
