BUTUAN CITY – Gikumpirma sa Department of Justice (DOJ) atol sa Senate Blue Ribbon Committee hearing nga 14 ra sa 421 ka flood control projects nga gi‑flag isip “ghost projects” ang nakumpirmang wala gyud mag‑exist.
Duha niini gisang‑at na ang kaso sa Sandiganbayan, samtang ang nahibilin nga 12 nga konektado sa SYMS Construction Trading ug Waowao Construction Trading padayon pa nga giimbestigar.
Sumala pa ni Acting Justice Secretary Fredderick Vida, ang ubang 421 projects wala pa makumpirma nga ghost projects ug padayon pa ang pagkolekta og ebidensya.
Gi-akusahan usab ni Senate President Pro‑Tempore Ping Lacson si kanhi DPWH Secretary Manuel Bonoan nga gituyo ang pagsumite og sayop nga grid coordinates sa Malacañang, nga nagresulta sa “grossly inaccurate data” sa validation.
Human niini, gibutyag ni DPWH Undersecretary Arthur Bisnar nga basin kinahanglan sugdan pag‑usab ang validation process dayong panawagan sa DPWH nga ipagawas ang listahan sa mga proyekto nga nakumpirmang nag‑exist aron ma‑limitahan ang scope ug makapokus sa case buildup batok sa mga ghost projects.
