BUTUAN CITY – Kasagaran pareho ra ang istorya sa pag-adopt og mananap kondiin ang usa ka tawo moadto sa shelter ug mangita og hayop nga iyang mabati ang koneksyon kondiin espesyal kaayo ang higayon rason nga ang iro o iring makabiya sa lisod nga kinabuhi ug magsugod pag-usab sa usa ka bag-ong panimalay.
Apan sa usa ka viral nga video, lahi ang pamaagi tungod kay dili ang tawo ang mupili sa iro, kundili ang iro ang mopili sa tawong gusto niyang musagop kaniya.
Ang setup yano ra tungod kay ang mga gusto my-adopt molingkod nga hilom ug dili manawag o mohikap.
Ang mga iro ipagawas usa-usa ug tugotan nga mulakaw ug mupili kung kang kinsa sila mobati og pagka-komportable.
Ang uban nga iro magtan-aw sa palibot, ang uban motan-aw sa daghang tawo, dayon mohunong sa tawong iyang mapiliay ug molingkod, musandig, o kaha ibutang ang ulo sa tuhod samtang ang uban manilap kansa buot ipasabot, nakapili na ang iro sa gusto niyang mahimong fur-parent.
Makita sa video nga ang mga tawong napilian malipay, mukatawa, ug ang uban motulo ang luha ilabina kung mabati nila ang tinuod ug espesyal ang koneksyon.
Kini nga pamaagi gigamit sa mga rescue group sama sa New York Bully Crew ug DARE Inc. Tumong nila nga makit-an ang sakto ug dugay nga panimalay para sa mga iro pinaagi sa natural ug walay pugos nga pagpili.
