BUTUAN CITY – Patay na dihang nakuha ang usa ka residente sa Brgy. Bayugan 3, Rosario, Agusan del Sur human kini nalumos sa may Panaraga Beach Resort, Brgy. Gamut, lungsod sa Barobo, Surigao del Sur, kagahapon sa alas-3 sa hapon.
Sumala sa mga nakasaksi, halos usa ka oras nga nangayo og tabang ang pamilya sa biktima apan walay mi-abot nga rescuer sa maong baybayon hangtud nga naka-abot si Neil Joy Cortez, residente sa maong lugar ug maoy nakarekober sa wala pa hinganling biktima.
Saysay ni Cortez, iyang narekober ang wala na’y kinabuhing lalaki sa giladmong duha ka dupa kansang distansya, 100-metros gikan sa baybayon. Ang iyang ka-uban na usab nga mangisdaay ang mitabang kaniya aron madala sa baybayon ang patay’ng lawas sa biktima.
Samtang usa usab ang patay, usa ang naluwas ug lain pang usa ang missing human mitiklaob ang ilang gisakyang kayak sa kadagatan sa Pasikon Beach resort sa Barangay Baybay, Burgos, Surigao del Norte ning mi-aging adlaw. Sumala sa Philippine Coast Guard kon PCG, dali silang mihimo og search and rescue operation human mitiklaob ang gamay nga bangka niadtong Martes, sa alas-12:15 sa udto.
Sakay ang mga biktima sa usa lang ka kayak dihang nakasugat kini og kusog nga balod hinungdan sa pagtikla-ob niini.
Naluwas sa mga rescuers sa PCG ang usa, samtang ang kauban nila nga 19-anyos nga taga Malolos City, Bulacan, maoy wala pa makita.
Gipahimangnoan usab sa PCG ang tanang sakayang pangdagat sa palibot nga magpabiling mabinantayon ug maniid sa palibot aron makita ang missing pang biktima.
