BUTUAN CITY – Mi-abot na sa 40 ang patay ug kapin 115 ang angol sa nahitabong sunog sa usa ka bar sa ski resort sa Crans-Montana, Swiss Alps, Switzerland dihang gisugat ang bag-ong tuig 2026. Sumala sa Cantonal Police of Valais, adunay nahitabong kusog nga pagbuto tungod sa maong sunog, apan walay indikasyon nga terorismo sa lugar.
Kadaghanan sa mga na-angol naka-angkon og grabe nga paso. Gi-ila ni President of the Swiss Confederation Guy Parmelin ang natigayong sunog nga usa sa pinakagrabeng trahedya nga nahitabo sa maong nasud.
Mi-abot sa 10 ka helicopter, 40 ka ambulansya, ug 150 ka rescue personnel ang gi-deploy aron matubag ang makalilisang nga panghitabo. Wala pa nasuta sa otoridad ang sinugdanan sa sunog ug wala pa usa’y kompirmadong nasyonalidad ug identity sa mga biktima.
Nahibalo-an nga ilado ang bar sa mga turista kansa temporaryo unang gisira ug gideklara ang temporaryong no-fly zone.
