BUTUAN CITY – Sayon na lang ang pagpatuman sa Bureau of Fire Protection-Butuan City Central Fire Station sa Oplan Paalala: Iwas Paputok tungod sa pag-ban na sa lokal nga kagamhanan sa pagbaligya sa mga pabuto ug uban pang mga pyro-technique devices.
Kini sukwahi matud pa sa senaryo sa siyudad, napulo ka mga tuig na ang nakalabay kondiin yano lang nga makita diha sa kadalanan ang mga bata nga magpabuto sa mga firecrackers bisan sa bulan pa lang sa Septembre.
Sa eksklusibong pakighinabi sa Bombo Radyo Butuan, gipadayag ni acting City Fire Marshal Sr Insp Ronald Vasquez nga ang gipatuman nila karong kampanya, base na sa memorandum circular nga gipagawas kaniadto ni kanhi Pangulong Rodrigo Duterte.
Hinuon aminado kini nga ila karong concern mao kadtong mga tawo nga mamalit og mga pabuto sa laing lugar ug dinhi gamiton sa siyudad tungod sa posibilidad nga mahimo kining hinungdan sa matigayong sunog.
Apil usab sa ilang bantayan ang mga mag-order og pabuto nga paliton online ilabina sa pagpatuman na unya nila sa heightened alert status sa Disyembre 22 hangtud Enero 2 sunod tuig.
Panghinaut na lamang niini ang malipayon ug hapsay nga pagsa-ulog sa Pasko ug pagsugat sa bag-ong tuig pinaagi sa pag-divert sa ubang mga gamiton nga pagsaba-sba aron likayan na sa hingpit ang mga pabuto.
