BUTUAN CITY – Malampuson ang switch on sa Festival of Lights sa Cabadbaran City kagabii nga gipahigayon sa Rizal Park nga kada-tuig nang ginahimo subay sa pagsa-ulog usab sa adlaw’ng natawhan ni late Cabadbaran Mayor Rosario ‘Sayong’ Amante – ang inahan ni incumbent Agusan del Norte Governor Ma. Angelica Rosedell Amante.
Gipadayag ni Mayor Judy Chin Amante nga ang kanhi mayor ang nagpasi-ugda sa pagpasiga og mga Christmas lights sa major thoroughfares sa ilang siyudad atol sa iyang adlaw’ng natawhan sa Disyembre 9 rason nga ila kining gipadayon matag-tuig.
Subay sa tinguhang hatagan og lingaw ingon man kalipay ang mga Cabadbaranons ug ang mga dayo, ubay-ubay nga mga lugar ang gibutangan nila og bongga nga ma Christmas lights ug decorations sa ingon, matabunan ang mga dili maayong kasinatian sa tanan nga na-apektuhan sa nanglabay’ng mga bagyo ug linog.
Samtang dako usab ang kalipay ni Agusan del Norte Congressman Dale Corvera sa kahigayunan nga nakatambong siya sa maong switch on ceremony nga mao lama’y iyang gi-uli gikan sa ukupadong trabaho sa Kamara.
Gibalik-lantaw pa niini ang pagpanguna ni late Mayor Sayong Amante sa pinaka-unang switch on sa mga Christmas lights niadtong tuig 1992 dihang konsehal pa usab siya sa siyudad.
Gipasalamatan usab niini ang mga city officials sa walay pu-as nga pagsuporta sa tinuig nga kalihukan sa ilang siyudad.
