BUTUAN CITY – Mikampyon sa bag-ohay lang nahuman nga Thailand Tropical Downhill Race 2025, usa ka international Downhill Skateboarding nga gipahigayon sa Chiang Rai, Thailand ang taga-Alegria, Surigao del Norte nga si Rydelle Grace Abarico, human niya nakuha ang unang pwesto sa duha ka kategorya nga Best Time Women ug Women’s Open.
Ang prestihiyosong kompetisyon gi-apilan sa kapin 85 ka mga professional downhill skateboarders gikan sa nagkalain-laing nasod.
Lakip sa nagdala sa bandila sa Pilipinas si Eryan Francis Samosino. Kahibaloan nga si Abarico mao usab ang mikampyon sa Women’s Open sa Thailand Tropical Downhill Race 2023 ug kasamtangang Top 4 sa World Ranking sa Downhill Skateboarding.
Bitbit ni Abarico ang iyang kalig-on ug dungog sa internasyonal nga entablado, samtang padayong nagdala og inspirasyon ug garbo sa iyang lungsod sa Alegria ug sa tibuok nasud pinaagi sa iyang mga kadaugan sa maong sporting event.
