BUTUAN CITY – Mahimo nang tawagan sa mga Butuanons panahon sa emerhensya ang Unified 911 Hotline nga daling respondihan sa kapulisan ug sa mga bombero sulod sa 5-minutos.
Sa eksklusibong pakighinabi sa Bombo Radyo Butuan, gibutyag sa tigpamaba sa Butuan City Police Office nga si PLt Joy March Estioco nga ang central hub sa 911 operator maoy mudawat sa tawag ug kung makuha na ang mga detalye nga ipa-abot sa mitawag, ipasa kini ngadto sa command center sa Department of Interior and Local Government kon DILG-Central Office sa Quezon City nga mao na usa’y mupasa niini ngadto sa Tactical Operation Center sa hingtungdang ahensya sa gobyerno nga duol sa lokasyon sa caller.
Giklaro sa opisyal nga tuig 2015 pa kini gipatuman apan mas gipahugtan kini sa termino ni kanhi PNP Chief Director General Nicolas Torre III nga maoy ila karong gi-adaptar.
Dugang pa ni Lt Esctioco, wala’y angayang kabalak-an ang mga tawong wala’y load sa ilang cellphone tungod kay ma-contact gihapon ang 911 dungan sa pagklaro nga anaa gihapon ang mga hotline numbers sa mga local police stations.
Apan panahon sa emerhensya, maglisod na pagdumdom ang mga hingtungdan rason nga mas daling magamit ang 911 hotline apil na ang pagresponde sa concern.
Ka-abag sa kapulisan ug sa Bureau of Fire Protection ang taga-City Disaster Risk Reduction and Management Department depende sa klase sa emergency call gamit ang cell phone, landline ug uban pang 3rd party calling applications nga maoy gamiton pag-dial sa 911.
