BUTUAN CITY – Naluwas sa mga sakop sa Women and Children Protection Center sa Philippine National Police ang upat ka mga menor-de-edad apil na ang usa ka puya sa gipakusgan nilang kampanya batuk sa Online Sexual Abuse or Exploitation of Children (OSAEC).
Atol kini sa gilusad nga rescue operation sa ilang Mindanao Field Unit sa lungsod sa Bayabas, Surigao del Sur, pagpanguna ni Col. Mario Baquiran Jr., human nakadawat og referral gikan sa Philippine Internet Crimes against Children Center (PICACC), base na usab sa rekomendasyon gikan saUnited Kingdom-National Crime Agency (UK-NCA).
Nasikop sa mga otoridad si Leonila Talikig Trangia, nga gi-akusahang migamit og bata aron makamugna, maka-produce, makabaligya ug maka-distribute og mga child sexual abuse ug exploitation materials (CSAEM) online gamit ang information and communication technology.
Ang upat kaa mga biktimang naluwas nga maoy gigamit aron makamugna og exploitative online content, naglakip sa duha ka mga batang babaye, usa ka batang lalaki ug bisan ang usa ka walo ka buwan pa lang nga batang lalaki.
Anaa na sila sa protective custody sa Municipal Social Welfare and Development Office (MSWDO) sa Bayabas alang sa assessment, evaluation ug intervention.
Isip parte sa operasyon, gipatuman sa mga otoridad ang warrant arpn pag-search, pagkumpiska ingon man pag-examine sa computer data nga maoy gigamit pagkolekta sa krusyal nga digital evidence.
