BUTUAN CITY – Misaka na sa pito ang ihap sa mga namatay sa Cordillera Administrative Region samtang ang pabilin pang missing human sa mga landslides ug pagkatumba sa mga kahoy tungod sa kusog nga ulan ug hangin nga hatud sa Super Typhoon Uwan.
Sa Tinoc, Ifugao, usa ka mag-uuma ang namatay human natabunan nga buhi sa landslide samtang natulog sa iyang payag ning mi-aging adlaw samtang sa Benguet, gikompirma ni Governor Melchor Diclas nga duha ang patay sa Buguias ug usa sa Kabayan — nga pulos mga biktima usab sa landslide kagahapon.
Sa Barlig, Mountain Province, usa ka 57-anyos nga lalaki ang namatay human malubong sa midahiling yuta pasado alas-3:00 sa kaadlawon kagahapon.
Sa Western Uma, Lubuagan, Kalinga, patay sila Eric Magwin ug Aki Magwin tungod sa landslide, samtang padayon pang gipangita sila Kagawad Redento Tino ug Ricardo Magwin.
Gila-umang musaka pa ang ihap sa mga namatay tungod kay nagpadayon pa ang pag-abot sa mga reports gikan sa ubang mga local government units.
Daghang mga dalan ug tulay sa Cordillera Administrative Region ang dili pa maagian tungod sa mga landslides, baha, ug nangatumbang kahoy, samtang nagpadayon ang clearing operations nga gihimo sa DPWH ug mga lokal nga gobyerno.
Padayon usab ang lapad nga brownout sa Baguio City ug Benguet Province human matumba ang daghang mga poste apan gilauman nga mabalik ang suplay sa kuryente ugmang adlawa, Miyerkules.
Naghatag usab ang mga lokal nga gobyerno, ahensya sa gobyerno, ug pribadong mga establisemento og libre nga charging stations ug temporaryong mga puy-anan para sa mga naapektuhang residente.
Sa Baguio City, wala’y natalang namatay samtang pabiling manageable ang mga lagoons, kanal, ug sapa.
