BUTUAN CITY – Gikumpirma ni United States Defence Secretary Pete Hegseth nga napatay sa ilang pwersa ang 14 ka mga tawo atol sa ilang pagtira sa upat ka gituohang drug boats sa Pacific Ocean. Samtang gipadayag usab sa Navy sa Mexico nga padayon pa silang nangita sa bugtong naluwas nga pasahero nga nahimutang mga 643-kilometros gikan sa baybayon sa Acapulco.
Kini mao ang pinakabag-ong insidente sa sunod-sunod nga mga pag-atake batok sa mga sakayan nga gi-alegahan sa Estados Unidos nga nagkarga og ilegal nga droga sa Pasipiko ug sa Caribbean.
Ang pinakabag-ong mga pagpamomba sa sidlakang bahin sa Pasipiko, nahitabo kagahapon ubos sa mando ni President Donald Trump, timaan pagpakusog pa sa kampanya sa Estados Unidos batok sa pagpanulod sa droga sa ilang nasud.
Apan, ang maong mga pagpamomba gibatikos sa rehiyon ug gidudahan sa mga eksperto ang legalidad niini. Bisan ang mga miyembro sa US Congress — gikan sa duha ka partido, Democrats ug Republicans, nagpafayag usab og kabalaka ug mikwestyon sa kagahom sa presidente nga magmando og ingon niini nga operasyon.
Sa laing bahin, gikondena ni Mexican President Claudia Sheinbaum ang maong pag-atake dayong mando sa ilang foreign minister ug mga representante sa ilang navy nga makigkita sa US ambassador aron hisgutan ang maong isyu.
