BUTUAN CITY – Gideklara ni Surigao del Norte Board Member Atty. John Cubillan nga tinuod ang ‘Siargao Curse’ kon tunglo sa Siargao.
Atol sa 16th Regular Session sa Sangguniang Panlalawigan, gi-expose sa magbabalaud ang gika-ingong mga ghost projects ug mga falsified reports sa government infrastructure developments sa Siargao Island.
Gitumbok ni Cubillan ang nagkakusog nga kasuko sa publiko nga gi-post online tungod sa nakitang mga ghost roads, ghost seawalls, ghost asphalting, ug uban pang mga proyektong gideklara nang siento-porsientong kompleto sa papel apan wala pa diay matapos samtang ang uban, wala’y makita sa project site.
Birada pa ni Cubillan, taliwa sa bilyunes pisos nga pundong gibubo ngadto sa imprastaktura sa maong isla, duna’y mga dalan nga wala’y padulngan kansa sukwahi sa mga reports sa mga official government documents nga gideklarang natapos na.
Isip tubag, gipadayag niining nagpapasar og resolusyon ang Sangguniang Panlalawigan nga nag-awhag sa Independent Commission on Infrastructure (ICI), apil na sa Department of Public Works and Highways (DPWH), sa Commission on Audit (COA), apil na sa Office of the Ombudsman, ug sa Department of Justice, nga maglusad og kinatibuk-an ingon man impartial investigation kalabot sa maong mga ghost projects sa nasangpit nga isla.
Naglaum ang magbabalaud nga pinaagi sa mga government agencies, mapanubag ang mga nalambigit sa maong anomaliya.
Kini ilabina nga ang maong mga ahensya ang duna’y kagahom nga makapangayo sa mga dokumentong kinahanglang makita sa katawhan aron mapruybahan kung unsa kagarapalan ang gihimong kurapsyon sa maong mga proyekto.
