BUTUAN CITY – Ubay-ubay nga mga isyu ang nasuta sa Philippine Anti-Corruption Commission (PACC) sa Poctoy–Bonifacio Bridge sa Surigao City, human ang gihimong full-scale investigation kagahapong adlawa.
Ang maong tulay nag-viral dihang gipakita ang mga litrato sa liki sa concrete deck niini taliwala nga wala pa kini opisyal nga na-turnover ngadto sa lokal nga panggamhanan.
Apil sa mga isyung nakita sa PACC ang lawom nga buak sa nasangpit nga tulay nga mi-abot sa gitas-ong 6-metros ug gilapdong 40-milimetros, kansa nagpakita matud pa og structural distress, improper curing, ingon man dili tukmang superbisyon.
Dugang nakita sa PACC ang kawalay nakabutang nga official DPWH project billboard, ingon man sa kakulang sa daily construction logs o documented quality test kansang workmanship, quality control, ug project supervision, ubos sa Department of Public Works and Highways (DPWH) Region XIII, ingon man sa contractor niini nga Tri-Parco Development Corporation.
Tungod niini, gipanawagan sa komisyon ang dinali-ang financial ug physical audit sa maong proyekto pinaagi sa Commission on Audit (COA) ug gihangyo usab niini ang paghimo og independent quality control tests aron pagkumperma sa integridad sa istraktura.
Patubagon usab sa PACC ang DPWH-Caraga ilabi na ang mga engineers niini kabahin sa gama sa ilahang contractor. Sa kasamtangan, sirado pa ang maong tulay alang sa full structural evaluation.
