BUTUAN CITY – Gipirmahan na sa mga lideres sa Estados Unidos, Egypt, Qatar, ug Turkey ang makasaysayanong kasunduan alang sa pagpatuman na sa Israel-Hamas ceasefire atol sa summit nga gipahigayon sa Sharm El-Sheikh, Egypt.
Gipirmahan kini nila United States President Donald Trump, ka-uban sila Egyptian President Abdel Fattah El-Sisi, ug mga representante gikan sa Qatar ug Turkiye.
Nakalatid sa maong kasabutan ang pagbuhi sa tanang mga buhi ug patay’ng bihag nga mga Israelis gikan sa Gaza ug halos 2,000 ka mga Palestinian prisoners gikan usab sa mga bilangguan sa Israel.
Tumong sa summit nga tapuson na ang giyera sa Gaza nga mikalas na og kapin sa 67,800 ka mga tawo ug mi-angol sa laing 170,000 sukad pa niadtong Oktubre 2023.
Kapin sa 30 ka mga world leaders ang mitambong sa summit, apil na ang mga representante gikan sa Germany, India, ug uban pang mga nasud.
