BUTUAN CITY – Gikumpirma ni United States President Donald Trump nga pirmado na sa Israel ug ang militanteng grupong Hamas sa Palestine ang unang hugna sa peace framework nga maoy magtugot sa paspas nga pagbuhi sa tanang gibihag sa Hamas sukad niadtong Oktubre 7, 2023.
Apan wala gi-apil sa pag-anunsyo ni Trump ang pipila ka mga lisod kaayong hisgutanan nga kinahanglan pang resolbahon apil na ang pagdis-arma sa mga militanteng Hamas ug ang umalabot nga kadumalahan sa enclave.
Sigon ni Prime Minister Benjamin Netanyahu, usa kini ka diplomatikong kalampusan ingon man nasudnong ug moral nga kada-ugan alang sa ilang nasud samtang gipadayag usab sa Hamas nga nakalatid sa kasabutan ang pagtapos na sa giyera sa Gaza, pag-atras sa Israel gikan sa ilang pagpanakop, pagpasulod sa mga hinabang ug ang pagbayluay sa mga piniriso.
Gipahibalo kini human ang duha ka tuig nga anibersaryo sa pag-atake sa Hamas nga mikalas og 1,200 ka mga tawo ug pagdagit sa kapin 200 ka mga bihag.
Tungod sa maong pag-atake, gihimo gilayon sa Israel ang init nga paggiyera sa Hamas nga miresulta sa pagkamatay sa 67,000 ka mga tawo nga kadaghanan, mga bata ug kababayen-an.
