BUTUAN CITY – Gikumpirma sa White House nga na-diagnose og chronic venous insufficiency si United States President Donald Trump human gipahigayon ang bilateral lower extremity venous doppler ultrasounds.
Ang chronic venous insufficiency usa ka kondisyon kondiin ang mga valves sulod sa ugat, dili na epektibo hinungdan sa dili tukmang pagdagayday sa dugo.
Sigon ni Press Secretary Karoline Leavitt, mihubag ang bitiis sa presidente rason nga gisusi siya sa iyang doktor nga si Capt. Sean Barbella ug dinhi nasuta nga aduna’y chronic venous insufficiency ang 79-anyos nga presidente.
Gipasabot sa doktor nga kasagarang makita kini nga kondisyon sa mga tawo nga nag-edad og 70-anyos pataas.
Giklaro usab ni Leavitt nga ang tanang laboratory tests sa US President, anaa sa normal limits ug wala’y ebidensya nga aduna kini grabeng vein thrombosis kon arterial disease.
Giklaro usab sa press secretary nga ang samad sa likod sa kamot sa US President, resulta sa kanunay niyang papag-inom og aspirin.
