BUTUAN CITY – Patay na ang usa ka Filipina caregiver nga si Leah Mosquera, 49-anyos ug lumad nga taga-Negros Occidental, human nga usa kini sa mga na-angol tungod sa pagpa-ulan sa Iran og missile ngadto sa Israel niadtung Hunyo 15.
Nasayrang naigo ang apartment sa maong OFW sa Rehovot, Israel rason sa pagka-angol niini.
Sumala sa Philippine Embassy sa Israel, gipailawom pa si Leah sa operasyon sa Shamir Medical Center ug nabutang kini sa intensive care unit kon ICU sulod sa pila ka mga semana.
Gikumpirma ang kamatayon niini sa igsoong si Joy nga caregiver usab sa sa maong nasod. Subay sa Embahada, gi-atiman na nila ang papeles arun ma-uli na ang patay’ng lawas ni Leah sa Pilipinas, ug mahatagan usab og tabang ang pamilyang Mosquera.
Gihandom usab sa embahada si Leah isip buotan ug mahigugmaong indibidwal, subo alang sa mga mahal niini kinabuhi nga dili na masaulog sa maong OFW ang ika 50-ka tuig niining adlawng natawhan karong Hulyo 29. Kahinumdumang nagsugod ang maong mga missile attack sa Iran ngadto sa Israel niadtung Hunyo 13.
