BUTUAN CITY – Napulo na ka mga crew members sa barkong M/V Eternity C ang naluwas samtang tulo ang kumpirmadong patay human kini gi-atake sa mga rebeldeng Houthis, resulta sa pagtiklaob niini sa Red Sea.
Ang Liberian-flagged, Greek-operated Eternity C, duna’y lulan nga 25 ka mga tripolante dihang kini nadamyos ug nawala ang tanan niining propulsion human na-igo sa rocket-propelled grenades nga gitira gikan sa mga gagmay’ng barko niadtong Martes, base na sa pagkumpirma sa UK Maritime Trade Operations kon UKMTO agency.
Gisigundahan ang maong pag-atake pagkasunod adlaw ug gisugdan ang rescue operations, pagkagabii na. Sigon sa mga rebeldeng Houthis nga suportado sa Iran, ilang gi-atake ang Eternity C tungod kay padulong kini sa Israel, ug gibitbit matud pa nila ang mga tripolante ngadto sa luwas nga lokasyon.
Samtang gipadayag sa US embassy sa Yemen nga gidagit sa mga Houthis ang wala pa masutang ihap sa mga tripolante dayong panawagan sa pagbuhi kanila. Gipagawas na usab sa mga rebelde ang video sa ilang pag-atake ug pagpa-unlod sa maong barko.
