BUTUAN CITY – Nakadawat og unmodified opinion ang Office of the Vice President kon OVP gikan sa Commission on Audit kon COA alang sa Calendar Year 2024, kansa maoy ikatulong sunod-sunod nga tuig nga gi-ila sa ahensya ang liderato ni Vice President Sara Duterte alang sa hapsay nga pagdumala niini sa pundo sa publiko.
Base sa 2024 Annual Audit Report sa COA, gikumpirma sa mga state auditor nga insakto, kasaligan, ug nasubay sa balaod, regulasyon, ug accounting standards ang mga financial statement sa OVP. Sumala sa maong report, 85.55% ang utilization rate sa OVP ilawom sa 2024 General Appropriations Act kon GAA, nga nagsilbing ebidensya sa maayong pagdumala sa pondo bisan pa sa mas lapad nga operasyon ug nagtubo nga panginahanglan sa serbisyo publiko.
Ang unmodified o unqualified opinion nagpasabot nga ang mga financial report nagtuman sa International Public Sector Accounting Standards kon IPSASs ug International Standards of Supreme Audit Institutions kon ISSAIs.
Kini pamatuod sa padayon nga paningkamot sa OVP pagpatuman sa mga prinsipyo sa transparency, accountability, ug ma-ampingong paggasto sa pondo sa katawhan, mga prinsipyo nga gipasi-ugdahan sa COA alang sa maayong pagdumala sa gobyerno.
