BUTUAN CITY – Wala gisira ni Senadora Risa Hontiveros ang posibilidad nga mahimo siyang standard bearer sa oposisyon sa 2028 presidential elections.
Ang pamahayag ni Hontiveros, tubag sa pangutana kaniya kung ikonsidera ba niya ang pagdagan pagka-presidente human sa tulo ka tuig o sa iyang termino.
Bisan bukas sa maong posibilidad ang senadora, gibutyag niini nga wala naka-focus ang iyang atensyon sa 2028 presidential elections, kondili sa paghi-usa sa mga ka-alyado nga misuporta sa Akbayan ug sa mga senator-elects nga sila Kiko Pangilinan ug Bam Aquino.
Karon nga lakip na sila Pangilinan ug Aquino sa 20th Congress, gibutyag ni Hontiveros nga sila ang magsilbing fiscalizer o watchdog sa gobyerno bisan og aduna sila’y nagkalain-lain nga desisyon ug panglantaw sa ubang mga isyu.
