BUTUAN CITY – Human sa pagkamatay ni Pope Francis, magsugod ang proseso sa pagpili sa iyang puli pinaagi sa usa ka papal conclave kondiin magtapok sa Sistine Chapel sa Vatican ang mga cardinals nga wala pa mag-edad og 80-anyos sulod sa 15 hangtod 20 ka adlaw human sa pagkamatay sa Santo Papa.
Ang mga kardinal magpili og sa usa ka kandidato nga makakuha og 2/3 nga boto kondiin ang matag-round sa botohay matapos pinaagi sa pagsunog sa mga balota. Kung itom ang mugawas nga aso, nagpasabot nga wala pa’y napili nga Santo Papa apan kung puti ang aso, nagpasabot nga aduna na sila’y napili.
Sa pagkamatay sa Santo Papa, ang Fisherman’s Ring ug ang papal seal giputol aron malikayan ang ilang pag-abuso. Ang lawas sa Santo Papa ipahimutang sa St. Peter’s Basilica sulod sa tulo ka adlaw aron makita sa publiko, ug ang haya magsugod sa Novemdiales, usa ka siyam ka adlaw nga panahon sa pag-ampo ug paghinumdom. Ang haya ipahigayon sa ika-upat hangtod ika-unom ka adlaw human sa pagkamatay.
Sa panahon nga bakante ang trono sa Santo Papa kansa gitawag nga sede vacante, walay Santo Papa nga naglingkod, usa ka temporaryo nga liderato ang mohupot sa Simbahang Katoliko hangtod mapili ang bag-ong Santo Papa.
