BUTUAN CITY – Patay ang usa ka motorista human nabanggaan ang iyang gimanehuang motorsiklo sa usa ka Toyota Hilux pick-up sa national highway sa Purok 1, Upper Libas, lungsod sa Tagana-an, Surigao del Norte, kagahapon sa ala-1:30 ang takna sa hapon, sa Huwebes Santo.
Naila ang namatay nga nagmaneho sa motorsiklo nga si Warvin Bogallon Labor, taga-Purok Tambis, Brgy. Campo, Bacuag, Surigao del Norte samtang ang nagmaneho sa Hilux naila usab nga si Valeriano Espinosa Sison II, taga- Borromeo Street, Brgy. Taft, Surigao City.
Migawas sa imbestigasyon sa kapulisan nga ang pick-up paingon sa Surigao City nga direksyon ug ang motorsiklo usab, paingon sa Bad-as dihang nagsugat sa maong lugar apan pag-abot sa dapit nga nahitaboan kalit nag-U turn ang pick-up, hinungdan nga nadasmag ang motorsiklo.
Gidala pa sa Surigao del Norte Provincial Hospital ang biktima apan gideklara kining dead-on-arrival sa attending physician samtang ang driver sa pick-up, padayon pang gi-imbestigahan.
