BUTUAN CITY – Nagbilin og gamay’ng kadaug ug nagpahikling sa pipila ka mga residente ang mi-igong magnitude 7.0 nga linog duol sa Tonga kaganinang ala-1:18 sa kaadlawon.
Base sa live video sa local media, milanog ang tsunami sirens human mi-igo ang linog aron pabakwiton ang mga residente sa luwas nga lugar.
Ang mga residente sa capital Nuku’alofa, mihikling padulong sa inland o mas taas nga ground.
Gidetalye ni Tongan Taekwondo athlete Pita Taufatofua sa iyang Facebook account, ang pagkahulog sa iyang mga gamit gikan sa mga istante ug lamesa apil na ang mga hulagway nga nakakabit sa bungbong samtang naglisod siya pagtindog.
Base sa US Geological Survey, ang epicenter sa linog, nasubay sa 100 kilometers gikan sa amihanang sidlakan sa main island, nga duna’y giladmong 29 kilometers. Gisundan gilayon kini sa magnitude 6.1 nga aftershock nga mi-igo sa susamang lugar.
Nag-isyu na usab ang Pacific Tsunami Warning Center og notice human sa linog tungod sa posibleng pagdagko sa balud apan gitangtang ra usab paglabay sa pipila ka mga oras. Sa inisyal nga report, wala’y gikatahong casualties samtang padayon pa nag gihimong damage assessment.
