BUTUAN CITY – Bisan pa man sa dinali-ang pagresponde ug paningkamot sa mga personahe gikan sa Terminal Management Office (TMO) sa Lipata, Surigao City, uban sa Philippine Coast Guard ug uban pang mga responding agencies, nakabsan gihapon sa kinabuhi ang usa ka 51-anyos nga lalaki human mi-ambak gikan sa usa ka cargo vessel kagahapon sa hapon samtang anaa na duol sa Punta Bilar sa maong siyudad.
Ang biktimang gi-ila nga si Martino Havana Cortez Jr., gikan sa Lubang, Occidental Mindoro, misakay sa LCT Georgia 1 ferry nag naglawig gikan sa San Ricardo Benit padulong ngadto sa Lipata Port kondiin mi-ambak kini pasado alas-12:30 kagahapon sa hapon.
Usa ka pasahero ang nakasaksi sa maong hitabo ug daling mipahibalo sa mga tripolante rason nga daling gihunong ang makina ug mi-dive gilayon ang crew member nga si Helmer Cabucos aron pagluwas kang Cortez gikan sa dagat.
Dali usab nga nagpadala og rescue teams ang TMO Lipata ug ang Coastguard ug daling gidala ngadto sa Caraga Hospital ang biktima alang sa medikal nga atensyon apan wala na kini maluwas pa.
Padayon pa usab nga gisuta ang motibo sa pag-ambak sa biktima kinsa nag-inusara lang sa pagbiyahe.
