BUTUAN CITY – Mi-ani karon og atensyon ang Barangay Addition Hills sa Mandaluyong City tungod sa pinasahi nilang kampanya batuk sa dengue kondiin ang ilang madakpan o kaha mapatay nga lima ka lamok, paliton nila og piso.
Sigon ni Kapitan Carlito Cernal, tumong niini nga mapugngan ang pagkaylap sa maong sakit nga nagkataas na ang kaso ug mitala na og pipila ka mga namatay.
Bisan og gikataw-an sa social media ang premyo, gipamugos ni Cernal nga gikinahanglan kini aron protektahan ang komunidad.
Nasayrang sukad gilusad ang maong programa, 21 na ka mga tawo na ang misalmot niini ug nakatigom na sila og 700 ka mga lamok ug mga kiti-kiti.
Gikalipay usab sa Department of Health (DoH) ang paningkamot sa maong barangay dayong awhag sa mga local government units nga sundugon ang mga standard nga estratehiya sa paglikay sa dengue.
