BUTUAN CITY – Ipailalom pa gihapon sa otopsiya patay’ng lawas sa usa ka lola nga nakaplagan nalang patay na og nabulag ang iyang ulo og lawas kagahapon sa alas 11:15 sa buntag sa gipuy-an niini Brgy. Candabong, Dumanjug, southern Cebu.
Naila ang biktima nga si Miguela Pocong Barino, 83-anyos nga nag-inusara lang nga nagpuyo sa iyang balay og pagabisitahon lang sa iyang apo og pag-omangkon.
Nadiskubrihan nalang sa 9 anyos nga apo sa tuhod sa biktima ang patayng lawas niini sa dihang ilang gisusi ang balay sa ilang apuhan.
Ang lawas sa biktima nag buy-od sa gawas sa pultahan samtang ang ulo niini naa na sa ubos sa hagdanan.
Nasayrang taod-taod na nga namatay ang biktima nga ilang gi bana-bana kapin na kini sa 48 oras tungod kay padung na nga ma lata (decompose) ang lawas niini.
Apan Walay nakita nga foul play ang kapulisan sa maong lungsod tungod kay wala man usab masamad ang lawas sa biktima.
Dako matud pa ang posibilidad nga tungod sa kadugay na nga nakabsan sa kinabuhi ang biktima gikaon na sa mananap ang liog niini nga maoy hinungdan nga nabuwag kini sa iyang lawas.
Wala usab silay nakita nga timailhan nga dunay laing tawo ang misulod sa balay sa tiguwang tungod kay ang mga gamit niini wala ra maunsa ug han-ay ra kini.
Gani ang kwarta nga moabot sa kapin P3,000 nga gibakus niya sa iyang hawak pinaagi sa panyo wala man hilabti lakip na ang alahas niini.
Wala usab sila maka kita og dugo sa duol sa lawas sa biktima.
