BUTUAN CITY – Gibutyag sa United Nations nga dili mu-ubos sa 700 ka mga tawo ang patay sa init nga binakbakay sa Goma, ang pinakadakong siyudad sa eastern Democratic Republic of Congo, sukad niadtong Lunes.
Sigon ni UN spokesman Stéphane Dujarric, mi-abot sa 2,800 ka mga tawo ang angol dihang gi-ilog sa mga rebeldeng M23 nga suportado sa Rwanda, ang capital sa North Kivu province ug padulong na ang mga rebelde sa habagatang bahin sa Bukavu, ang capital sa South Kivu.
Ang kagubot sa sidlakang bahin sa Congo nagsugod niadto pang 1990s apan paspas kining mikaylap ning nakalabay nga mga semana. Sigon sa rebeldeng grupong M23, nga gilangkuban sa mga ethnic Tutsis, nakigbatok sila alang sa katungod sa minority samtangang kagamhanan sa Congo usab nagbutyag nga ang maog grupo nga suportado sa Rwanda, gustong kontrolon ang lapad nga mineral wealth sa eastern region.
Dugang ni Dujarric, posibleng musaka pa ang ihap sa mga namatay. Sa tumong nga mapugngan ang paglambol sa progress, nagmontar ang militar og usa ka defensive line sa dala tali sa Goma ug Bukavu.
