BUTUAN CITY – Dili matud pa malimod sa administrasyong Marcos nga political persecution ang ilang gihimo ngadto sa pamilya Duterte tungod sa kanunay nga pagbantay og binta aron sila makapuntos.
Sigon ni Davao City Mayor Sebastian ‘Baste’ Duterte, mas gipa-init pa sa administrasyon ang sitwasyon tungod sa pataka nga pagpagawas og pamahayag nga gikuha sa unod sa press conference sa iyang amahan nga si kanhi Pangulong Rodrigo Duterte taliwa nga wala kini giluwat sa iyang amahan.
Partikular nga gitumbok sa mayor ang gipasi-atab sa administrasyon nga nanawagan matud pa ang kanhi pangulo ngadto sa militar nga mu-alsa na taliwa nga klaro sa maong press conference nga dili gusto niini ang iyang amahan.
Nag-ugat matud pa ang kasaba karon sa pulitika sa pagpa-imbestiga sa confidential ug intelligence fund sa iyang igsoong si Vice President Sara Duterte.
Alayon niini, iyang gihagit ang administrasyon nga kung tinud-anay ang ilang imbestigasyon, dili lang ang pundo sa iyang igsoon ang imbestigahan kondili apil na ang sa mismong presidente padulong na sa pinaka-ubos nga opisyal sa kagamhanan nga nagdawatan niini apil na ang mga buhatan sa gobyerno.
