BUTUAN CITY – Nagdesisyon ang mga miyembro sa House Committee on Good Government and Public Accountability nga magtampohay aron maghatag og reward sa bisan kinsang makatudlo kang “Mary Grace Piattos” nga dunay dakong nakuha sa confidential funds sa Office of the Vice President.
Gikumpirma ni Zambales Representative Jay Khonghun nga mohatag sila og usa ka milyong piso sa makahatag og impormasyon kung kinsa ug asa si Piattos.
Sigon ni Khonghun nga bisan og dunay uban pang mga pangalan nga kadudahan sa acknowledgement receipts, si “Mary Grace Piattos” ang daw dunay pinakadakong nakuha.
Mitumaw ang pangalan ni Piattos sa pagdungog sa Good Government and Public Accountability diin usa matud pa kini sa signatories sa acknowledgement receipts nga gisubmite sa OVP sa COA may kalabutan sa confidential funds.
Bisan si La Union Representative Paolo Ortega nagbutyag nga daw sari-sari store ang mga gigamit nga pangalan sa OVP.
Nasubo usab sila Khonghun ug Ortega nga dili motambong si Vice President Sara Duterte sa sunod nga pagdungog sa House panel bisan og personal nang gitunol kanya ang imbitasyon.
