BUTUAN CITY – Gipa-subpoena sa Senate Blue Ribbon subcommittee pagpanguna ni Senate Minority leader Aquilino ‘Koko’ Pimentel ang mga gi-imbitahang indibidwal apan wala mutunga sa hearing kalabot sa drug war sa Duterte administration.
Dihang gisaysay sa Committee Secretary nga wala sila Royina Garma, Kerwin Espinosa ug uban pa, dinhi na nagmosyon si Senador Ronald “Bato” dela Rosa nga ipa-subpoena ang tanang gi-imbitar sa chamber sa maong public hearing apan wala mupatim-aw.
Sigon ni Senador Bato, na-obserbahan na hinuon niya nga dili gusto sa mga nahimong witness sa House Quad Committee nga mugawas ang kamatu-uran, rason sa wala nila pagtunga sa Senado. Dali kining gisegundahan ni Senate President Pro Tempore Jinggoy Estrada apan nag-interject ra usab siya sa mosyon aron kini amendahan sa ingon mapagawas ang subpoena ad testificandum.
Ang gikatingala lang ni Sub-Committee chairman Koko Pimentel, nganong dili i-share sa House Quad Committee ang address sa sa mga gi-imbita sa Senado taliwa nga gikostudiya na kining daan sa maong komite sa nakalabay na nilang mga pagdungog.
Partikular niini si Kerwin Espinosa gawas nila Garma nga mipa-ilalom sa medical check-up ug retired ational Police Commission chief Edilberto Leonardo nga duna’y COVID-19.
