BUTUAN CITY – Padayon pang gi-imbestigahan sa kapulisan sa Zamboanga City ang pagpusil-patay sa usa ka babayeng radio reporter niadtong Martes sa gabii, Oktubre 22.
Gi-ila ni Police Regional Office-9 Director Brig. Gen. Bowenn Joey Masauding ang biktimang si Maria Vilma Rodriguez, 56-anyos, single mother ug host sa usa ka public affairs program sa 105.9 EMedia Radio, kansa duna usa’y online platform.
Migawas sa inisyal nga imbestigasyon nga tulo ka higayong gipusil ang biktima gamit ang usa ka .38 revolver samtang naglingkod-lingkod lang kili sa tindahan sa iyang inahan sa Comet Street, Barangay Tumaga sa maong siyudad.
Daling gidala sa ospital si Rodriguez apan gideklaara kining dead on arrival sa attending physician.
Padayon pang gipanubayan sa kapulisan ang dapit nga nahitabuan ug usa sa mga anggulong gilantaw mao ang dakong bangi sa biktima ngadto sa pipila niya ka mga kabanay nga misangpot sa pagpatay kaniya.
