BUTUAN CITY – Nahatagan na og temporaryong kagawasan, ang senior broadcaster ug station manager sa 93.1 Brigada News FM–Davao nga si Junior “Jun” Ortiz Digamon, human gisikop niadtong Biernes tungod sa paglapas matud pa sa Republic Act (R.A.) No. 11313 kon mas nailang Safe Spaces Act.
Base sa report sa Davao City Police Office (DCPO), gisikop ang 55-anyos nga si Digamon base sa warrant of arrest nga gi-isyu ni Judge Sherila Resabal-Vinluan, sa Municipal Trial Court in Cities XI Branch 6, sulod mismo sa sibyahan sa Brigada News FM-Davao, sa Brgy. Ulas, sa maong siyudad. Gibuhian siya human nakapyansa balor P24,000 sa maong adlaw.
Nasayrang gikasuhan si Digamon human nag-post sa iyang Facebook account nga nagtawag sa mikaso kaniya og dili maayong mga pulong sama sa pangit, putot, lisngag og ilong, tambuk ug uban pa kansa mao ang gender-based sexual harassment.
Madumdumang niadtong Nobyembre tuig 2020, naaresto usab si Digamon tungod sa kasong cyber libel tungod gihapon sa iyang Facebook post nga nagsaway sa medical center sa Digos City tungod sa ilang salawayong buhat ngadto sa usa ka pasyente.
