BUTUAN CITY – Gikalipay sa barangay council sa Brgy. Masao ning siyudad sa Butuan, ang pagpahigayon sa Bombo Radyo Butuan sa Bombo Radyo and Star FM Bancarera 2024 tungod kay nakatabang kini sa panudlanan sa ilang barangay.
Sigon ni Kagawad Ricky Demata, chairman sa Committee on Environment and Tourism sa Brgy. Council, ang maong kalihukan nagdani sa katawhan nga mudayo sa ilang barangay aron musaksi sa maong kalihukan kansa maghatag usab og kadasig sa ilang ekonomiya tungod kay aktibo man ang dagan sa negosyo ilabina sa mga nagnegosyo sa baybayon.
Napasalamat usab siya nga wala’y dautang nahitabo sa maong kalihukan kondiin natapos kini nga hapsay ug gikalipay sa tanang nakasaksi.
Karong tulo ka tuig na kining gihimo sa Bombo Radyo, mutatak na matud pa sa huna-huna sa katawhan ang maong kalihukan nga ginahimo matag-Adlaw Hong Butuan rason nga usa na usab kini sa mga kalihukang ilang atangan.
Tungod sa dakong impact nga nahatud sa Bombo Radyo Bancarera diha sa ilang barangay, andam matud pa sila kanunay mahimong host sa maong kalihukan.
