BUTUAN CITY – Dako ang pagtuo ni political analyst Atty. James Reserva nga dili muhurot pagdagan sa Senado sila kanhi Pangulong Rodrigo Duterte ug mga anak niining sila Congressman Polong Duterte ug Davao City Mayor Baste Duterte.
Kini isip reaksyon sa pamahayag ni Vice President Sara Duterte nga andam ang mga Duterte father and sons, pagdagan sa maong posisyon sa 2025 mid-term elections.
Sa pakighinabi sa Bombo Radyo Butuan, gipadayag ni Atty. Reserva dili mahitabo nga biyaan sa mga Duterte ang ilang balwarte, ang Davao Region. Sa iyang lantaw, posibleng mudagan matud pa sa Senado ang kanhi pangulo ug si Mayor Baste samtang magpabilin sa Davao City si Congressman Polong.
Sa natad sa pulitika ning mga higayona, gipadayag ni Atty. Reserva nga nagpabiling kusog ang mga Duterte ilabina nga makumpara sa mga yanong Filipino ang daghang mga maayong nahimo sa kanhi administrasyon batuk sa kasamtangang Marcos Jr. administration.
Dili matud pa malikayan nga makumpara sa mga tawo ang nagapanghitabo panahon sa Duterte administration batuk sa kasamtangang administrasyo ilabina ang pagbalik na karon sa kaylap nga operasyon sa ginadiling druga.
Anaa pa ang grabeng pagmahal sa presyo sa bugas human nga wala matuman ang gisaad ni Pangulong Bongbong Marcos panahon sa kampanya nga ibalik sa tag-20 pisos ang matag-kilo niini.
Kini matud pa ang hinungdan nga solido pa ang suporta sa mga tawo ngadto sa mga Duterte nga mudagan sa senado ang kanhi pangulo,dako ang tsansa nga mao kini ang manguna sa mga boto.
