BUTUAN CITY – Suportado ni Agusan del Sur Gov. Santiago ‘Santi’ Cane Jr. ang mga lakang sa Department of Environment and Natural Resources-Protected Area Management Office kon DENR-PAMO nga ma-apil sa World Heritage Site list sa United Nations Educational, Scientific and Cultural Organization kon UNESCO ang Agusan Marsh Wildlife Sanctuary (AMWS) isip natural heritage site.
Una nang nakigkita ang mga personahe sa Department of Environment and Natural Resources Protected Area Management Office kang Gov. Cane alang sa tinguha nga makuha ang ilang suporta aron hugot nga mapangandaman ang preliminary assessment o ang ikaduha sa upat ka proseso sa World Heritage Nomination.
Aron masiguro ang kalampusan nga mahilakip sa UNESCO World Heritage list ang Agusan Marsh Wildlife Sanctuary, nagtibanabangay ang mga ahensya sa panggamhanan alang sa pagmugna og team nga mututok sa pagpangandam sa preliminary assessment.
Kahibaloan nga usa ang Agusan Marsh Wildlife Sanctuary sa mga sites sa Pilipinas nga na-publish sa UNESCO website tentative list niadtong Marso 11 ning tuiga.
