BUTUAN CITY – Dako ang kalipay ni Kapitan Imelda Pontimar sa Brgy. Bit-os ning siyudad sa Butuan nga apil sila sa 13 ka mga barangay nga gipa-ilalom na sa state of calamity tungod sa grabeng pagbaha nga ilang nasinatian.
Sa eksklusibong pakighinabi sa Bombo Radyo Butuan, gipadayag ni Kapitan Pontimar nga kapin na sa usa ka gatus ka mga pamilya kon 500 ka mga indibidwal sa ilang barangay ang nabahaan human nga ang unang 44 ning mia-ging adlaw, nadugangan na usab og 31 kagabii ug wala pa’y labot niadtong nagdumili pa sa pagbakwit.
Sigon sa kapitan Pontimar, magamit na unya nila ang ilang calamity fund sa tuig 2023 nga wala nila mahilabti balor 69-mil pisos.
Una nang gisaysay ni Kapitan Pontimar nga una nilang gihikling ning mi-aging adlaw pa, ang mga residente duol sa Agusan River ilabina sa Purok 6 nga gisugdan sa Purok 8 hangtud nga gipatuman na niya ang forced evacuation.
Gipangplastar nila ang mga bakwit sa ilang Senior Citizen’s Office building, barangay hall, day care center, stage sa ilang dancing hall ug sa covered court.
Giklaro ni Kapitan nga matag-buntag, tugutan niya ang iyang mga constituents aron masuhid ang ilang pinuy-anan apan pag-aksyon og ngit-ngit, ila na kining pabalikon.
Gani bisan kaganinang buntag, ila pang gibantayan ang ilang mga residente sa Purok 2 tungod sa padayong pagsaka sa tubig-baha nga halos mi-abot na sa ilang salog.
Nagdumili matud pa ang maong mga residente pagbalhin sa ilang mga designated evacuation centers ug mihangyong diha na lang sila muplastar sa CAR-BDP area dayong hangyo nga pahulamon lamang sila og tent nga magamit nila sa pagsilong.
Nasayrang gawas sa Bit-os, apil sa mga barangay ning siyudad nga napa-ilawom na sa state of calamity ang Aupagan, Buhangin, Florida, Golden Ribbon, Mahay, Mandamo, Maon, Pangabugan, Tungao, Baan Riverside, Dankias ug Banza.
