BUTUAN CITY – Hugot ang pagsupak sa Gabriela Partylist sa gihimong people’s initiative aron iduso ang pag-amyenda sa batakang balaod kon charter change.
Kini tungod sa mga alegasyong gigamit na ang pondo sa gobyerno sama sa AICS kon Assistance to Individuals in Crisis Situation sa Department of Social Welfare and Development aron lang makakuha og pirma sa tawo.
Sa eksklusibong pakighinabi ning sibyahan kang Gabriela Partylist Representative Arlene Brosas dili na people’s initiative kon pugson ang tawo sa pagpapirma.
Bisan sa datus nga 79 porsiento sa katawhan ang wala makasabot sa 1987 constitution ang duna nay problema sa maong pamaagi.
Sa lantaw ni Congresswoman Brosas dili kinahanglan nga usbon ang balaod tungod kay ang gikinahanglan sa tawo nga kausaban mao ang pagpabaratu sa nag-unang palaliton, pagpataas sa suhulan, og pagmugna og daghang trabaho.
Dili usab kini kumbinsido nga ang aspeto lang sa ekonomiya ang usbon tungod kay masulod na niini ang pulitiko aron sa ingon magpabilin sila sa puwesto.
Gibutyag ni Congresswoman Brosas nga kinahanglan gayud nga dunay imbestigasyon nga himoon sa signature campaign pinaagi sa giduso nilang House Resolution number 1541.
