BUTUAN CITY – Tingkagol na sa prisuhan ang usa ka engineer human nakuhaan og ilegal nga drogas lakip na armas sa gikasang operasyon sa kapulisan sa nakalabay nga gabii pasado alas 7:00 ang takna sa Purok-1, Barangay Dumalagan, Butuan City.
Naila ang suspetsado nga si Engr. Abelard Salcedo Medado alyas Abel, 51-anyos, olitawo og residente sa maong dapit kansa gikonsiderang High Value Individual Regional Top Priority Target.
Bitbit sa otoridad ang search warrants nga gipagawas sa Presiding Judge, sa RTC Branche 33, 10th Judicial Region, Hall of Justice, Libertad, Butuan City may kalapasan sa RA 9165 og RA 10591.
Atol sa operasyon, nakuha gikan sa posisyon sa suspek ang usa ka heat sealed plastic transparent sachet sa suspected shabu nga mitimbang og tulo ka gramos lakip na ang nagkadaiyang illegal drug paraphernalias.
Nakuha usab ang usa ka unit sa kalibre punto 45 nga pistola nga dunay 3 ka magazin og 12 ka mga buhing og laing usa ka unit sa .9mm caliber pistol nga dunay usa ka magazin og upat ka buhing bala.
Ang nakumpiskang mga butang lakip na ang suspetsado gikustudiya na karun sa Butuan City Police Office alang sa tukmang disposasyon.
