BUTUAN CITY – Gikumpirma ni JC Solomon, tigpamaba sa National Intelligence Coordinating Agency kon NICA-Caraga nga mga striker applicants nila ang nalambigit sa pagpamusil pasado alas-dies kagabii sa may Camella Homes sa Brgy. Villa Kananga ning siyudad sa Butuan.
Sa eksklusibong pakighinabi sa Bombo Radyo Butuan, gibutyag ni Solomon nga parehong anaa na sa luwas nga kahimtang ang duha nila ka mga aplikante kansang identity padayon pang gitago samtang nagpadayon pa ang imbestigasyon sa kapulisan.
Gibutyag niining naka-inom matud pa ang syuspetsadong taga-Davao Region nga gikan sa salo-salo ug nanghulam og armas dihang mipa-uli na sa gisak-an nilang safe house kondiin nakalalis niini ang iyang ka-ubanang aplikante rason nga gi-apartar gilayon kini ug dihang migamit na kini og pusil, na-igo ang mi-apartar nilang ka-ubanan sa pipila ka higayon.
Base sa report sa kapulisan, misulay matud pa og pusil sa iyang ulo ang suspetsado apan napugngan kini sa mga ka-uban rason nga na-igo lang kini sa nawong ug pareho na silang gidala sa ospital.
