BUTUAN CITY – Gikumpirma ni Palestinian Ambassador to the Philippines Saleh Asa’ad Fhied Mohammad sa eksklusibong pakighinabi sa Bombo Radyo Cagayan de Oro nga kapin na sa 900 nila ka mga kababayan ang nakalas sa air strikes nga gilusad sa Israeli forces ngadto sa ilang teritoryo.
Apil sa maong ihap ang 200 ka mga bata ug 80 ngadto sa 90 ka kababayen-an.
Gibutyag sa opisyal nga dismayado sila sa gihimo sa Israel tungod kay ang gihimo matud pa niining panimalos, makonsidera mang genocide.
Gibalik-lantaw pa niini nga nagsugod ang kada-adlaw nga pag-atake sa Israel ngadto sa ilang estado, 75 ka mga tuig na ang nakalabay nga misamot pa dihang nagdesisyon matud pa ang United Nations pagtunga sa Palestine taliwa sa kagamay lang sa area niini aron lang matud pa mahatag ngadto sa Israel.
Ang ilang gikasuko tungod kay 78-porsiento sa ilang luna gihatag matud pa sa UN ngadto sa Israel samtang 22-porsiento lang sa luna ang gihatag kanila.
