BUTUAN CITY – Maglusad og nationwide transport strike ang grupong Manibela karong Lunes, Oktubre 16 aron iprotesta ang kahiwi-an sa pag-apruba sa prangkisa alang sa mga public utility vehicles (PUVs).
Sigon ni Manibela chairman Mar Valbuena, misaad og suporta ang tanan nilang mga miyembro nga makighi-usa sa transport strike, partikular na sa Metro Manila, CALABARZON kon Calamba, Laguna, Batangas, Rizal ug Quezon ingon man sa Central Luzon. Ang mga membro sa Manibela gilangkuban sa mga drivers ug operators sa mga de-pasayruang jeepney, UV Express ug multicab.
Dugang ni Valbuena, kini unya ang pinakadakong transport strike nga masinatian sa gobyerno tungod kay magpahigayon sila og lihok-protesta atubangan sa Land Transportation Franchising and Regulatory Board, Department of Transportation ug sa Malacañang.
Apan gipasabot ni Valbuena nga wala nila gikontra ang gobyerno kondili ang kahiwian nga mao matud pa’y hinungdan kung nganong naglisod ang katawhang Pilipino ug naglaum nga ma-aksyunan sa pangulo.
