BUTUAN CITY – Gi-contempt na sa Senado ang upat ka mga lider sa kultong Socorro Bayanihan Services Inc. tungod sa balik-balik nga pagpamakak sa alegasyong gibato ngadto kanila gikan sa mga membrong mibiya sa grupo.
Atol sa Senate hearing nga gipangunahan sa Senate Committee on Public Order and Dangerous Drugs ug sa Committee on Women, Children, Family Relations and Gender Equality, gi-usa usa ni Senadora Risa Hontiveros ang mga akusasyong rape, human trafficking ingon man pagpugos sa mga batan-on paglangoy sa mga hugaw sa tawo, batuk sa mga lider sa gika-ingong kulto.
Gilangkuban kini nila cult leader Jey Rence Quilario, Karren Sanico, Janet Ajoc ug Mamerto Galanida. Bisan pa man sa balik-balik nga pasidaan ni Senador Ronald ‘Bato’ de la Rosa nga dili mamakak, apan gibarugan sa mga niini ilabina sa lider sa kultong si Jey Rence Quilario nga wala siya nagpatuman og child marriages ug wala usab mipahunong pagpatungha sa gatusang kabataan. Sulod gawas lang matud pa ang mga bata sa ilang compound ug ila-ila lang ang akusasyng gihapak batuk sa ilang grupo.
Apan dihang gipangutana ni Senador Bato si Socorro Mayor Riza Rafonselle Taruc-Timcang sa dagan sa enrolment sa kabataan sa ilang lungsod niadtong 2019, dinhi niya gibulgar ang massive dropout gikan sa elementarya ukg sekondrya kondiin kapin 800 matud pa ka kabataan ang wala na mangeskwela.
