BUTUAN CITY – Gipangunahan mismo ni Commission on Elections kon COMELEC chairman Atty. George Erwin Mojica Garcia, ang 2nd Regional Joint Security Control Center Command Conference nga gipahigayon kagahapong adlawa dinhi sa dakbayan sa Butuan.
Kini aron personal nga masayran ang sitwasyon sa Caraga Region subay sa nagkaduol na nga Barangay ug Sangguniang Kabataan Election.
Sa eksklusibong pakighinabi ning sibyahan, gibutyag ni Commission on Elections-Caraga Regional Director Francisco Pobe nga tumong ni chairman Garcia nga makakuha og first-hand information kalabot sa seguridad sa rehiyon alang sa umalabot nga eleksyon apil na ang delivery sa mga election paraphernalia ug pagpatuman sa kampanya batuk sa premature campaigning ug vote buying.
Dungan sa command conference ang pag-activate sa Regional Committee on Kontra-Bigay alang sa hugot nga kampanya batuk sa vote-buying.
Gituyuan usab sa opisyal ang personal nga pag-anhi sa Carga Region tungod sa kontrobersyal nga Socorro Bayanihan Services Incorporated aron duna’y mahatag nga satong impormasyon higayong ipatawag unya sa Senado.
Kini ilabina nga kinahanglan nilang masiguro nga ma-exercise sa mga membro sa gika-ingong kulto ng ilang katungod nga makabotar.
