BUTUAN CITY – Monitoring pa lang ang gihimo sa Department of Trade and Industry kon DTI-Caraga sa mga rice retailers nga gimanduang musunod sa price ceiling nga ni Pangulong Ferdinand ‘Bongbong’ Marcos Jr pinaagi sa gipagawas niining Executive Order No. 39.
Sa eksklusibong pakighinabi sa Bombo Radyo Butuan, gibutyag ni Atty. Kurt Chino Montero, hepe sa Consumer Protection Division sa Department of Trade and Industry kon DTI-Caraga, nga kini tungod sa kagamay lang sa panahon nga gipahibalo kini ngadto sa mga retailers human gipagawas ang kamanduan niadtong Biernes ug gipatuman gilayon kagahapon, Septembre 5.
Base sa ilang monitoring, pipila pa lang ka mga tindahan ang naka-comply sa kamanduan ni Pangulong Marcos.
Higayong mugawas sa ilang monitoring nga milapas gayod ang mga rice traders, murekomenda sila og pagpasaka og kaso diha sa ilang monitoring report nga ilang isubmite ngadto sa ilang sentrong buhatan.
Giklaro usab niini nga ang ilang gibantayan mao lang ang mga regular ug well-milled rice ug wala’y labot ang ubang variety ilabina ang mga imported nga klase.
Subay niini, mihangyo siya sa mga rice retailers nga magsakripisyo una og dyutay alang sa mga konsumidor tungod kay duna matud pa’y ayudang ihatag ang gobyerno kanila.
