BUTUAN CITY – Nagduso na og motion to reduce bail bond sila Kapitan Allan Toyco ug Kagawad Lina Inot sa Brgy. Salvacion ning siyudad human nalutsan og warrant of arrest tungod sa kasong ilang gi-atubang nga paglapas sa Anti-Graft and Corrupt Practices Act sa Branch 3, Hall of Justice ning siyudad.
Nag-ugat ang kaso sa reklamong giduso sa mga residenteng sila Feromina Eballe, Rodrigo Dumaguing ug Danny Podiotan tungod sa eksklusibong paggamit sa maong mga barangay officials sa ilang barangay site nga alang unta sa pabalay sa mga residenteng anaa sa danger zones.
Sa eksklusibong pakighinabi sa Bombo Radyo, gipadayag ni Dumaguing nga gikan sa 90-mil pisos nga pyansa sa matag-usa, mihangyo sila Toyco ug Inot nga himuon na lang kining 45-mil pisos. Ang ila na lang gikalipay tungod kay mismong ang Ombudsman na ang mipasaka og kaso batuk sa maong mga opisyal ug gihimo na lang silang mga saksi human nakitaan og probable cause ang una nilang reklamo.
Bisan og suod nila ang maong mga opisyal apan gusto nilang dil na kini ma-usab pa ug dili sundugon tungod sa klarong sayop niini kondiin ang 3.7-ektaryang barangay site nga bahinon unta sa 32 ka mga lote aron balayan sa katwhan, gibalayan lang sa maong mga opisyal uban usab ni kanhi Kagawad Junie Ulahay.
Karong Agusto 23 mao matud pa ang unang pagtaral sa maong kaso ug blangko pa sila kung unsa ang mahimong dagan niini.
Ang ila usab nga gikadismaya tungod kay gisulayan sila sa city council nga ire-trial ang kaso taliwa nga nahukman na kini ni kanidto Vice Mayor Jose ‘Joeboy’ Aquino II kondiin nadesisyunang suspendihon og duha ka buwan sila Kapitan Toyco ug Kagawad Inot apan nahulog lang kini sa ataw-ataw.
