BUTUAN CITY –
Gipangunahan ni Department of the Interior and Local Government kon DILG Secretary Benjamin Abalos, Jr. ang grand launching ug rollout sa Buhay Ingatan, Droga’y Ayawan kon BIDA sa lalawigan sa Agusan del Norte ug Butuan City.
Mitambong usab si Agusan del Norte Gov. Maria Angelica Rosedell Amante, Police Regional Office-13 Regional Director Pablo Labra II, DILG Asst. Regional Director ug OIC Donald Seronay, mga heads sa mga national government agencies ug ubang mga local government officials.
Gilusad kini pinaagi sa advocacy run nga gibansagan og BIDA-gan, kondiin mas gipakusgan ug mas holistic ang kampanya sa DILG batok sa iligal nga druga aron makunhuran ang drug demand sa komunidad.
Sa iyang pagpamulong, gipadayag ni Sec. Abalos nga tumong sa maong kalihukan ang pagpalapad pa sa drug-free ug mas luwas nga rehiyon pinaagi sa pag-promote sa mga positibong impluwensya sama sa pagpa-ambit sa mga testimoniya ug mga success stories sa mga tawong nakarekober na gikan sa ginadiling druga ug sa mga epekto niini ngadto kanila.
Gipadayag usab niini nga ang pagsumpo sa iligal nga droga, dili lang trabaho sa Philippine National Police kon PNP, Philippine Drug Enforcement Agency kon PDEA ug National Bureau of Investigation kon NBI kondili sa matag-usa.
