BUTUAN CITY – Aminado si Connie Calo, Public Information Officer sa Department of Public Works and Highways kon DPWH-Caraga nga dunay mga aspalto sa national highway ning rehiyon sa Caraga ang nangburot og maoy hinungdan sa mga disgrasya.
Mahitungod usab sa Daang-Maharlika sa Surigao-Agusan Area o gikan sa Lipata ngadto sa Ampayon diin dunay mga parte sa kalsada nga nangburot, giklaro ni Calo nga gihinabi na sa ilahang opisina ang mga contractor niini nga misaad usab nga ilaha kini gilayong remedyuhan. Sigon sa maong opisyal nga naka-kontrata ang nasangpit nga dalan sa longterm maintainance program sa central office diin nakumpleto na sa nakalabay nga tuig. Apan bisan paman nga nakumpleto na ang proyekto, duna gihapoy defect liability ang contractor tungod sa epekto nga nagbawod-bawod nga dalan.
Lakip sa nakitang hinungdan niini mao ang gibag-on sa aspalto. Kini usab ang senaryo sa super highway sa D.O. Plaza Avenue particular na ang Diosdado Macapagal Bridge.
Sumala sa opisyal nga gamay lang ang pondo sa maintainance project.
Sigon usab ni Calo nga duna na silay proyekto sa Agusan Del Sur karong tuiga asa naglakip kini sa re-blocking, widening ug rehabilitation rasong dili tinood nga wala nagpakabana ang buhatan sa maong probinsiya. Ang nahimong problema lang kay dili ang tibook dalan sa Agusan Del Sur ang masakop sa maong mga proyekto tungod kay magdepende man kini sa pondo sa General Appropriation Act.
